Disgrifiad Swydd

Teitl Swydd: Uwch Bartner Busnes Adnoddau Dynol

Gradd 7

Tîm/Cyfarwyddiaeth: Pobl a Galluoedd y Weinyddiaeth Gyfiawnder - Partneriaethau Busnes Adnoddau Dynol (HMPPS)

Crynodeb o’r rôl:

Y Weinyddiaeth Gyfiawnder sy’n gyfrifol am bopeth sy’n ymwneud â rhedeg systemau cyfiawnder sifil a throseddol y DU, gan greu’r sylfeini ar gyfer cymdeithas ddiogel, deg a ffyniannus. Rydym yn un o adrannau mwyaf y llywodraeth, gyda dros 88,000 o staff wedi'u lleoli ledled Cymru a Lloegr. Rydym yn gyfrifol am 500 o lysoedd a thribiwnlysoedd, 122 o garchardai, y polisïau sy’n sail i’r system a llawer mwy.

Mae tîm Pobl a Galluoedd y Weinyddiaeth Gyfiawnder yn cefnogi'r sefydliad drwy alluogi ei bobl i fod y gorau y gallant fod. Byddwn yn adolygu ac yn gwella'r gwasanaethau a ddarparwn yn barhaus er mwyn sicrhau ein bod yn darparu gwasanaethau o safon uchel i'n cwsmeriaid. Mae gan dîm Pobl a Galluoedd y Weinyddiaeth Gyfiawnder dros 1,400 o weithwyr proffesiynol ymroddedig a galluog sy'n darparu gwasanaethau sy’n ymwneud â phobl ar draws y teulu Cyfiawnder. Ein pobl sydd wrth galon y gwaith o ddarparu'r gwasanaethau hyn.

Bydd Partneriaid Busnes AD yn gweithio'n agos gydag Uwch Arweinwyr i gefnogi'r gwaith o ddatblygu strategaethau busnes drwy Ymgynghori ac Ymyrryd ym maes AD ar faterion sy'n ymwneud â phobl, gan gyflawni rhaglenni a chynlluniau newid yn llwyddiannus drwy ddulliau newid Pobl cynhwysfawr.

Mae'r swydd hon yn dod o fewn y Tîm Partneriaethau Busnes Adnoddau Dynol (HMPPS), a bydd yn cefnogi nifer o Gyfarwyddwyr ar draws y Grŵp Carchardai, y Gwasanaeth Prawf neu'r Pencadlys a'u huwch dimau arwain yn HMPPS.

Gan weithio o fewn y tîm Partneriaethau Busnes Adnoddau Dynol (HRBP) dan arweiniad dau Gyfarwyddwr Adrannol ar gyfer HMPPS, byddwch yn atebol i Arweinydd Ardal HRBP Gradd 6.

Byddwch yn gyfrifol am feithrin cysylltiadau cynhyrchiol gydag uwch dimau arwain perthnasol, gan alluogi blaenoriaethau a strategaethau busnes i gael eu trosi'n agenda gydlynol ar gyfer pobl gydag ymyriadau penodol.

Byddwch yn gweithio ochr yn ochr â Chyfarwyddwyr a'u Huwch Dîm Arwain i ddylunio a darparu ymyriadau AD wedi'u teilwra’n benodol i sbarduno gwelliannau o ran arweinyddiaeth effeithiol, rheoli pobl, dylunio a datblygu sefydliadol, rheoli newid a strategaeth y gweithlu.

Mae'r angen i fod yn weithiwr AD proffesiynol da, gyda'r gallu i sefydlu perthnasoedd o safon, yn allweddol i'r rôl hon. Gan weithio ar draws tîm Adnoddau Dynol y gwasanaethau rhanbarthol / arbenigol, y rôl hon yw'r prif gyswllt ar gyfer uwch randdeiliaid. Mae ei llwyddiant yn dibynnu ar gryfder a chefnogaeth gweddill y Partneriaethau Busnes Adnoddau Dynol (HMPPS) a thimau Pobl a Galluoedd y Weinyddiaeth Gyfiawnder drwy'r Cydwasanaethau a'r Gwasanaethau Arbenigol, felly bydd angen i'r unigolyn allu cyflawni drwy eraill.

Byddwch yn:

• Arwain y sgwrs fusnes strategol ar flaenoriaethau pobl ar lefel cyfarwyddwr.

• Gwerthuso effaith dylanwadau mewnol ac allanol ar y gweithlu drwy’r amser.

• Gweithio gyda'ch Gradd 6 yn arwain ac yn datblygu tîm HRBP.

• Rhannu dysg ac arferion sy'n seiliedig ar dystiolaeth o bob rhan o'r Weinyddiaeth Gyfiawnder, swyddogaeth ehangach y Gwasanaeth Sifil a chymaryddion ehangach yn y sectorau cyhoeddus a phreifat.

• Dylunio a/neu gomisiynu ymyriadau AD ar raddfa fawr gan Ganolfannau Arbenigedd AD.

• Hyfforddi arweinwyr ar weithredu rhaglenni Adnoddau Dynol sydd wedi'u cynllunio a heb eu cynllunio, a'u darparu'n amserol ac yn effeithlon.

• Chwarae rhan allweddol yn y gwaith o godi safon arweinyddiaeth a rheoli pobl.

Cyfrifoldebau, Gweithgareddau a Dyletswyddau:

Bydd gofyn i ddeiliad y swydd ddwyn ynghyd y blaenoriaethau sy'n ymwneud â phobl ar gyfer eu maes busnes ar lefel cyfarwyddwr, gan weithio mewn partneriaeth gyda rhwng un a thri Chyfarwyddwr a'u huwch dimau arwain, yn dibynnu ar ba mor gymhleth yw natur y grŵp cwsmeriaid.

1. Partneriaethau strategol: Cyfrannu at y sgwrs fusnes drwy gefnogi arweinwyr i sbarduno strategaethau pobl sy'n galluogi adrannau/Cyrff Hyd Braich i gyflawni eu hamcanion.

2. Datrys: Rhoi mewnbwn strategol ar bynciau sy’n ymwneud ag Adnoddau Dynol a helpu arweinwyr i ddatblygu atebion effeithiol i broblemau sy’n ymwneud â phobl.

3. Cysylltu: Helpu'r sefydliad i ddefnyddio gwasanaethau priodol y Grŵp Pobl a chymorth gwasanaethau a rennir.

4. Hyfforddi: Hyfforddi arweinwyr ar sut i reoli materion sy’n ymwneud â phobl a gyrru’r agenda pobl yn ei blaen yn effeithiol.

Elfennau Cyflawni Allweddol:

Newid Busnes a Diwylliant

• Datblygu a gweithredu strategaeth AD i sbarduno ac ategu’r rhaglen Un HMPPS. 

• Gweithio gyda Chyfarwyddwyr fel rhan o Uwch Dimau Rheoli i ddatblygu a gweithredu strategaeth AD a busnes, gan sicrhau bod gan HMPPS y strwythur, yr hinsawdd a'r gallu cywir i reoli newid a phontio.

• Rhoi cyngor ar y goblygiadau i bobl sy'n deillio o gynlluniau newid mawr a darparu goruchwyliaeth dechnegol ar gyfer cyflogaeth/Adnoddau Dynol. 

Adnoddau a Chadw

• Sicrhau bod y gweithlu'n cael ei gynllunio'n effeithiol ar lefel cyfarwyddwr sy'n cyd-fynd â dyraniadau’r gyllideb ac sy'n bodloni gofynion capasiti a gallu, ynghyd â defnyddio strategaethau denu, talent a datblygu priodol.

• Gweithio mewn partneriaeth â'r busnes i weithredu strategaethau adnoddau priodol, gan gynnwys deall y llif o dalent i SCS1 a Band 11 drwy gynllunio olyniaeth a mynd i'r afael ag anghenion datblygu priodol i ddatblygu olynwyr da.

Gallu Arwain a Rheoli

• Deall yr anghenion sy'n gysylltiedig â galluoedd arwain, a datblygu a meithrin galluoedd arwain ac arweinyddiaeth effeithiol drwy hyfforddi, herio a mentora Cyfarwyddwyr ar faterion yn ymwneud â busnes a phobl.

• Gweithio drwy'r Tîm Gallu Sefydliadol i gael gwasanaethau priodol i sicrhau bod gan dimau arwain y gallu i fod yn fodelau rôl ar gyfer arwain newid yn effeithiol.

• Deall y bylchau o ran galluoedd rheoli a chefnogi'r busnes i feithrin galluoedd.

Perthynas rhwng Cyflogeion

• Goruchwylio gwaith achos cymhleth, gan gefnogi Cyfarwyddwyr a'u Huwch Dimau Arwain i gael gafael ar y gwaith achos a'r cyngor cyfreithiol priodol.

• Defnyddio gwybodaeth am waith achos i nodi lle gallai ymyriadau pellach fod yn briodol er mwyn mynd i'r afael â newid ymddygiad diwylliannol neu unigol a galluoedd rheoli.

Ymgysylltu â Chyflogeion

• Bod yn bartner i’r Uwch Dimau Arwain drwy waith dadansoddi a deall canlyniadau'r Arolwg Pobl ar lefel cyfarwyddwr. Cefnogi'r gwaith o gynllunio camau ymateb a hwyluso mynediad at gyngor a gwasanaethau i gefnogi ymyriadau.

• Dal y busnes i gyfrif am waith ymgysylltu â chyflogeion, sy'n cael ei arwain o'r brig, gan helpu i ganfod yr arferion gorau ar draws HMPPS.

Presenoldeb a Lles

• Goruchwylio diwrnodau gwaith a gollwyd ar gyfartaledd (AWDL) er mwyn galluogi'r Cyfarwyddwr i ddal Uwch Dimau Arwain i gyfrif am bresenoldeb ar draws eu maes busnes.

• Bod yn bartner i arweinwyr i sbarduno’r ymyriadau cywir, gan hwyluso mynediad at wasanaethau priodol i ddod â lefelau AWDL i lawr. Cynghori ac arwain ar strategaethau priodol i fynd i'r afael ag achosion lle mae’r lefelau AWDL yn uchel.

• Galluogi'r busnes i ddeall iechyd presennol ei weithlu a chefnogi'r busnes i gael gafael ar wasanaethau lles.

Cydraddoldeb, Amrywiaeth a Chynhwysiant

• Sicrhau bod effeithiau ar gydraddoldeb yn cael eu deall a'u hystyried wrth roi pob cynllun sy'n ymwneud â phobl ar waith.

Cymwysterau

Rhaid i chi fod wedi cwblhau a chael eich MCIPD Siartredig (neu fod â chymhwyster cyfatebol ym maes AD), a dangos Datblygiad Proffesiynol Parhaus neu fod yn barod i ennill y cymhwyster o fewn 2 flynedd i’ch penodiad.

Lleoliad/Teithio:

Lleoliadau; JSO Caernarfon, Tŷ Churchill Caerdydd, JSO Hwlffordd, JSO Merthyr Tudful, JSO Casnewydd, JSO Abertawe, JSO Brynbuga a JSO Wrecsam.

Mae'n ofynnol i'r ymgeisydd llwyddiannus deithio i unrhyw Weinyddiaeth Gyfiawnder/Carchar/Safle Prawf yng Nghymru.

Y broses ymgeisio:

Didoli

Ymddygiad:

• Gweld y Darlun Mawr (Ymddygiad Arweiniol)

• Cyfathrebu a Dylanwadu

• Arweinyddiaeth

• Rheoli Gwasanaeth o Safon

Os byddwn yn derbyn nifer fawr o geisiadau, byddwn yn didoli’n bennaf ar ymddygiad arweiniol Gweld y Darlun Mawr. Bydd ymgeiswyr llwyddiannus wedyn yn cael eu gwahodd i gyfweliad, a fydd yn profi eu hymddygiad a’u cryfderau.

Profiad - Datganiad Addasrwydd - Mewn 500 gair, amlinellwch y sgiliau a'r profiad sydd gennych sy'n dangos eich addasrwydd ar gyfer y rôl hon (cofiwch gyfeirio at y meini prawf hanfodol yn y disgrifiad swydd).

Cyflwynwch gopi dienw o'ch CV os gwelwch yn dda.

Cyfweliad:

Bydd y cyfweliadau’n cael eu cynnal o bell.