Gwasanaeth Llysoedd a Thribiwnlysoedd EF

Teitl y Swydd: Tywysydd - mae’r swydd hon yn cynnwys Llys y Goron a’r Llys Ynadon

Cefndir a phrif bwrpas y rôl

Mae’r Tywysydd Llys yn bwynt cyswllt cyntaf hanfodol ar gyfer pob defnyddiwr llys sy’n gysylltiedig â gwrandawiadau. Bydd cysylltiad rheolaidd â’r farnwriaeth, gan gynorthwyo'r staff gweinyddol er mwyn sicrhau bod gwaith y llys yn rhedeg yn hwylus. Byddwch yn cyfarfod aelodau’r cyhoedd a’u cynrychiolwyr cyfreithiol; byddwch yn paratoi ystafelloedd llys/gwrandawiadau, ac yn cwblhau dogfennau, yn ogystal â sicrhau bod y llys yn rhedeg yn hwylus ac yn effeithlon. Byddwch hefyd yn ymgymryd â gwaith clerigol cyffredinol fel sy’n ofynnol er mwyn cefnogi gwaith GLlTEF.

Er bod llawer o’r tasgau yn syml, ac yn cael eu rheoli gan gyfarwyddiadau manwl a/neu ganllawiau sydd wedi hen ennill eu plwyf, mae'n rhaid i dywysydd fod yn barod i ymateb yn gyflym ac yn broffesiynol i sefyllfaoedd, a bydd rhai ohonynt yn annisgwyl. Byddwch yn gyfforddus wrth ymdrin yn sensitif ac yn broffesiynol â phobl o bob cefndir; mae’n bosib y bydd llawer ohonynt yn fregus a dan straen. Mae cyngor a chefnogaeth ar gael yn hwylus a ni cheir gwyro fawr ddim oddi wrth weithdrefnau safonol. Gall hyn olygu y bydd gofyn i chi fod yn gadarn pan na fydd defnyddiwr llys yn deall neu’n croesawu’r gweithdrefnau hynny. Mae tywyswyr yn gweithio mewn tîm sydd â chefnogaeth reoli reolaidd ac maent yn gyfrifol am eu hamser eu hunain.

Er y cewch i ddechrau eich lleoli mewn swyddfa neu lys penodol, bydd angen bod yn hyblyg i weithio o bryd i’w gilydd mewn llysoedd a swyddfeydd lleol eraill.

Gall y prif gyfrifoldebau gynnwys:

Gwaith Gweinyddol	Casglu a danfon ffeiliau a dogfennau i’r farnwriaeth a’r clercod a sicrhau fod ganddynt y papurau angenrheidiol Rhoi cefnogaeth i gydweithwyr a’r farnwriaeth y tu allan i amseroedd llys / gwrandawiad Gwaith clercio cyffredinol, gan gynnwys defnyddio cyfrifiaduron a chynorthwyo ar y switsfwrdd Llenwi ffurflenni Gweithredu offer recordio a chadw cofnod o recordiadau o wrandawiadau Rhoi trefn ar restri gwrandawiadau ar gyfer hysbysfyrddau mewnol ac allanol a’u dosbarthu
Gohebiaeth	Llenwi ffurflenni safonol ayyb, pan fydd yr wybodaeth wedi’i diffinio’n glir. Drafftio dogfennau syml megis cydnabyddiaethau a derbynebau, hysbysiadau cadarnhad, gorchmynion llys, gwarantau ayyb.
Delio â’r Post	Agor, didoli, dosrannu ac anfon y post fel sy’n ofynnol Casglu a dosbarthu’r post o swyddfeydd priodol
Monitro Stoc	Sicrhau bod y ffurflenni a’r deunydd ysgrifennu perthnasol yn yr ystafelloedd llys Casglu a dosbarthu deunydd ysgrifennu i’r swyddfeydd.
Mewnbynnu a chofnodi data	Cofnodi, gwirio cywirdeb a sicrhau bod prosesau trin arian syml yn gyflawn yn erbyn y canllawiau neu brofforma e.e. cyflwyno taliadau rheithgor, gwario arian mân dan gyfarwyddyd.
Defnyddio offer	Offer swyddfa a’r llys e.e. cyfrifiaduron, peiriannau ffacs, sganwyr, llungopiwyr, switsfyrddau, peiriannau ffrancio, offer anfon negeseuon, recordwyr tâp a fideo ayyb.
Trin galwadau ffôn	Ateb ymholiadau safonol a throsglwyddo negeseuon i eraill.
Trefnu cyfarfodydd	Paratoi ystafelloedd ar gyfer gwrandawiadau, tribiwnlysoedd, treialon, cyfarfodydd a chlirio’r llys / ystafell wrandawiadau ar ddiwedd y dydd ayyb. Defnyddio dyddiaduron electronig
Derbyn unigolion sy’n mynychu’r llys	Gan gynnwys aelodau’r cyhoedd, y farnwriaeth, y rheithgor, cyfreithwyr a bargyfreithwyr, yr heddlu, cynrychiolwyr o asiantaethau allanol ayyb. Darparu gwybodaeth am yr achos, hebrwng defnyddwyr y llys i ac o’r adeilad, tyngu llwon ayyb. Galw unigolion i mewn i’r ystafelloedd llys / gwrandawiadau yn y drefn flaenoriaeth, trafod materion gyda’r Clercod Llys a’r Cynghorwyr Cyfreithiol a chysylltu â’r Gwasanaeth Tystion yn ôl yr angen Ateb ymholiadau wyneb-yn-wyneb Rhoi’r wybodaeth ddiweddaraf i bartïon ynghylch newidiadau i’r ystafelloedd llys a’r amseroedd gwrandawiadau

Dyletswyddau eraill

Mae gofyn i ddeiliad y swydd weithio mewn ffordd hyblyg ac ymgymryd ag unrhyw ddyletswyddau rhesymol eraill, ar gais rheolwr llinell, sy’n gymesur â gradd a lefel cyfrifoldeb y swydd hon.

Sgiliau

Profiad o weithio gyda'r cyhoedd mewn amgylchedd gwasanaeth cyhoeddus prysur. Y gallu i ddefnyddio cyfrifiadur ar y lefel sydd ei angen ar gyfer y gwaith.

Cyflawni Gweithredol yn GLlTEF

Mae’r rôl hon yn rhan o’r Proffesiwn Cyflawni Gweithredol. Yr unigolion hyn yw wyneb allanol y llywodraeth gan eu bod yn darparu gwasanaethau hanfodol i’r cyhoedd mewn amryw o rolau gwahanol. Maent yn gweithio mewn amryw o wahanol adrannau ac asiantaethau ar draws y DU, yn darparu gwasanaethau i gwsmeriaid mewn

Rolau wyneb yn wyneb yn GLlTEF er enghraifft tywysydd llys
Rolau yng Nghanolfan Gyswllt GLlTEF er enghraifft cynghorwyr yn y ganolfan alwadau
Rolau prosesu yn GLlTEF er enghraifft staff yn y Ganolfan Hawliadau am Arian yn y Llys Sirol a Gweinyddiaeth y Llysoedd a Thribiwnlysoedd

Mae bod yn rhan o’r proffesiwn cyflawni gweithredol yn golygu eich bod yn perthyn i gymuned traws-lywodraethol o bobl. Bydd yn gyfle i chi gael mynediad i wybodaeth am safonau proffesiynol, datblygu sgiliau a chymwysterau fydd yn eich helpu chi i barhau i wella eich datblygiad a'ch perfformiad ac estyn eich opsiynau gyrfa.